– Det er problem med å koma gjennom på telefon

– På grunn av den pågåande hendinga med problem hos Telenor, er det no også problem med å koma gjennom på telefon til Bjørnafjorden og Samnanger legevakt, opplyser avdelingsleiar ved legevakta i Bjørnafjorden og Samnanger, Trude Fjæreide.

For nokre timar sidan, blei det kjend at Telenor hadde store utfordringar. Situasjonen for SMS og mobilnett skal ha blitt normalisert i 18-tida, ifølgje Telenor.

Men utfordringane med taletrafikk er framleis ikkje løyst. Det opplyste dekningsdirektør Bjørn Amundsen til NRK.

Telenor-kundar melder om problem med mobilnettet

Naudetatane er råka. Det er også meld om full togstans. Det er også ei utfordring å ringja til og frå Telenor-kundar.

Og det er ikkje heilt rett fram å koma gjennom til legevakta.

– Dersom ein opplever problem med å koma gjennom på telefonnummer 116 117 når ein kontaktar legevakta for Bjørnafjorden, Samnanger eller Austevoll, kan ein prøva telefonnummer 56 57 03 70, opplyser Fjæreide.

I ei melding til avisa skriv ho at legevakta på Moberg er bemanna som vanleg. I Eikelandsosen vil vaktlege vera tilgjengeleg på kontoret mellom klokka 18 og 20.

– Dersom ein har behov for legehjelp som ikkje kan venta til fastlegekontoret opnar, kan ein oppsøkja legevakta direkte på Moberg. Dette gjeld også for innbyggjarar i Eikelandsosen, så lenge telefonproblema varer.

OPPDATERT: Litt før klokka 19 opplyser Telenor om at problema er løyste.